«Бэрт Мохсоҕол — 2020»

Олунньу 29 күнүгэр биһиги гимназиябытыгар сылын ахсын ыытыллар “Бэрт Мохсоҕол” күрэх буолан ааста.

Уол оҕо анала үрдүктэн үрдүк. Ол курдук, орто туруу дойдубутугар ааҥнаабыт алдьархайтан араҥаччылыыр, батастаахтарга баттаммат, баараҕай бастыҥтан бастыҥ-бэргэн уолаттарбыт  буолаллар.

Былыргы сахалар үһүйээннэригэр, остуоруйаларыгар, сэһэннэригэр уол оҕо бэйэтин эр бэрдэ, ыал сатабыллаах аҕата, өйүн-санаатын туһунан бигэргэтэн, элбэх эрэйдээх, сороҕор мүччүргэннээх сырыыны сылдьар үгэстээх. Уол оҕо, биир күн ат өрөҕөтүгэр, биир күн ат уорҕатыгар диэн мээнэҕэ эппэттэр.

Өбүгэлэрбит “бэрт Мохсоҕол” (“славный парень, молодец, сокол”) диэн, улаатан эрэр уол оҕону лаппа, хайгыы көрдөхтөрүнэ эрэ этэллэрэ. Эр сүрэхтээх, хорсун-хоодуот дьону модун мохсоҕолго холооһун, Мохсоҕолунан ааттааһын ордук олоҥхоттон  хото  көстөр.

 “Бэрт  Мохсоҕол” күрэхпитигэр  8 – 10  кылаастартан биирдии уолан уол кыттыыны ылла. Күрэх сыала-соруга: Өбүгэ үгэстэрин иҥэрии, патриотическай өйгө-санааҕа иитии, чөл олоххо тардыы, эт-хаан өттүнэн сайыннарыы.

Күрэхпит эмиэ буоларын курдук, икки сиринэн ыытыллыбыта. Аактабай  саалага кыттааччыларбыт уустаан-ураннаан, хомоҕойдук хоһуйан бэйэлэрин билсиһиннэрбиттэрэ. Ону тэҥэ, олоххо-дьаһахха сыһыаннаах тургутуулары ааспыттара. Онтон, таҥастарын – саптарын уларыттан, спортивнай саалаҕа күүстэрин-уохтарын тургутуһан көрдөрбүттэрэ.

Уолан-уолаттарга аналлаах “Бэрт Мохсоҕол” күрэххэ эриирдээх-мускуурдаах күөн-көрсүһүү кэнниттэн кыайыылааҕынан таҕыста 8 “б” кылаас үөрэнээччитэ Слепцов Вячеслав, иккис миэстэни ылла 11 “а” кылаас үөрэнээччитэ Заровняев Иван уонна үһүс миэстэҕэ таҕыста 8 “а” кылаас үөрэнээччитэ Тимофеев Аркадий.

Гимназия бары уолаттарын, эр дьон учууталларын ааспыт Аҕа дойдуну көмүскээччилэр күннэринэн өссө төгүл эҕэрдэлиибит! Үлэҕитигэр, үөрэххитигэр үрдүктэн үрдүк ситиһиилэри баҕарабыт.

«Бэрт Мохсоҕол» күрэх хаатыскаларын манна күрүөххүтүн сөп
https://vk.com/album-109825_270583397

Добавить комментарий