«Алтан чуораан алгыһынан…»

Урааҥхай Саха оҕото төрөөбүт төрүт тылын биллин диэн, билии-көрүү үрдэлин үөрэ-көтө дабайдын диэн аһыллыбыт А.Г. уонна Н.К.Чиряевтар ааттарынан Дьокуускай куораттааҕы национальнай гимназияҕа ыам ыйын 30 күнүгэр 28-ыс выпуск, 2020 сыл выпускниктара күлэн-оонньоон айдаарсан, сэмэлэнэн-хайҕанан, күүстээх дьаныар үөрэхтиин күрэхтэспит кэмнэрэ үтүө түмүктэнэр кэрэ-бэлиэ күннэрэ үүнэн, Тиһэх чуорааҥҥа аналлаах «Алтан чуораан алгыһынан…” тэрээһин үөрүүлээх быһыыга-майгыга буолла.

Ылыммыт сыаллара ыпсан истин, тутуспут суоллара тупсан истин диэн туран, выпускниктарга алгыс тылларын анаан эҕэрдэлээтилэр гимназия директора Саха республикатын үөрэҕириитин туйгуна, «Методист Якутии” анал бэлиэ хаһаайына Пермякова Валентина Семеновна, 2016-2020 сс. Саха республикатын үөрэххэ уонна наукаҕа миниистирэ, Саха республикатын үүнэр көлүөнэтин Целевой фондатын генеральнай директора Егоров Владимир Анатольевич, көрөн-истэн, иккис ийэ кэриэтэ буолан сылдьар кылаас салайааччылара саха тылын уонна литературатын үрдүк категориялаах учуутала Кириллина Күндэлиинэ Трофимовна, Российскай Федерация норуотун үөрэҕириитин туйгуна, Саха республикатын методист-учуутала, учууталлар учууталлара, үрдүк категориялаах математика учуутала Иванова Надежда Николаевна, 11 сыл анараа өттүгэр үөрэнээччилэрин, сылаас илиилэригэр бигээн ылбыт, амарах санаалаах аан-маҥнайгы учууталлар Саха республикатын үөрэҕириитин туйгуна, Чурапчы улууһун Соловьев нэһилиэгин баһылыга Кронникова Мария Филипповна, гимназия алын сүһүөҕүн үрдүк категориялаах учуутала Алексеева Ефросиния Жарафовна, гимназия алын сүһүөҕүн маҥнайгы категориялаах учуутала Местникова Мария Владимировна, Афанасьева Ирина Егоровна уонна  төрөппүттэр.

Киэҥ билиини иҥэрбит, уһуйан үөрэппит-такайбыт убаастабыллаах  учууталлара выпускниктарга тиһэх чуорааннарынан истиҥ эҕэрдэ тылларын анаатылар, бииртэн-биир интэриэһинэй, дириҥ ис хоһоонноох уруоктары ыытаннар уонна педагог-организатор Горохова Елена Александровна салайааччылаах «Үрдэл» оҕо хамсааһына эҕэрдэлээннэр  кылаас чаастарын олус киэргэттилэр.

Үөрэнээччилэрбитигэр, республикабыт, дойдубут инники сайдыытын түстэһиэхтэрэ диэн эрэлбит улахан. Оҕолорбут, үөрэппит убаастабыллаах учууталларыгар, гимназия салайааччыларыгар, бары үлэһиттэригэр махталлара муҥура суох.

Күндү выпускниктарбытыгар бүгүҥҥү күннэрэ сайаҕас санааны салайдын, үгүс үтүөнү үмүөртүн!



Юдина Анна Семеновна

Добавить комментарий