Сүрэхтэнии. 5 уонна 8 кылаастар

Сэтинньи 6 күнүгэр 2020-2021 үөрэх дьылыгар гимназия президенин уонна премьер-миниистирин талар долгутуулаах күн үүннэ. Ол курдук гимназия сайдыытыгар олус суолталаах күҥҥэ 5-ис уонна 8-ыс кылаастар үөрэнээччилэрэ орто уонна үрдүкү сүһүөх үктэллэригэр дабайан тахсар, гимназист үрдүк аатын толору сүгэр уонна 8 кылаастар гимназия президенин талар быыбарга аан-маҥнайын кыттар быраабы ылбыттарын бэлиэтиир сүрэхтэниилэрэ буолла.
Маннык үтүө күҥҥэ гимназистары төрөөбүт тылларынан холкутук саҥаран-иҥэрэн, үчүгэйдик үөрэнэн, эргиччи үүнэн-сайдан тахсалларыгар баҕаран туран, гимназия директора Пермякова Валентина Семеновна эҕэрдэлээтэ.
5 «а» кылаас (Терентьев А.А.), 5 «б» кылаас (Спиридонов М.М.), 5 «в» кылаас (Габышева О.К.), 8 «а» кылаас (Адамова С.А.), 8 «б» кылаас (Дьячковскай Е.Н.) кэлэктииптэрэ бэйэлэрин кылаастарын тустарынан видеоролик устаннар билиһиннэрдилэр. Гимназистар ааттарыттан андаҕар тыллары эттилэр 8а кылаас үөрэнээччилэрэ Анастасия Боброс, Сергей Копырин уонна 8б кылаас үөрэнээччилэрэ Мария Еттянова, Арсений Колесов.
Бу күнтэн саҕалаан, 5-ис уонна 8-ыс кылаас үөрэнээччилэрэ, үөрэххэ күүстэрин-уохтарын өссө күүскэ уураннар, кыһалланнар, кылаастарын, гимназияларын олоҕор көхтөөхтүк кыттаннар, гимназияны бүтэрээччилэри чиэстээхтик солбуйуохтара, гимназист үрдүк аатын түһэн биэриэхтэрэ суоҕа диэн эрэнэбит.

Киһи буолан үүнэргэ,
Кэскиллээҕи өйдүүргэ,
Үтүө-мааны майгыга,
Үөрэх-билии ыларга
Үөрэтэр-иитэр
Гимназиябыт биһиэнэ.

Добавить комментарий